AUTOIMMUN TIREOIDITNING HOMILADORLIKKA TA’SIRI

Ushbu tadqiqot autoimmun tireoiditning (AIT), xususan Hashimoto tireoiditining, homiladorlik davridagi patofiziologik va klinik oqibatlarga ta’sirini tizimli va chuqur tahlil qilishga qaratilgan bo‘lib, uning reproduktiv yoshdagi ayollarda global epidemiologik tarqalishi va homiladorlikning perinatal natijalariga ta’sirini o‘rganadi. Tadqiqot AIT bilan og‘rigan homilador ayollarda onaga xos (preeklampsiya, yo‘ldosh ajralishi, tug‘ruqdan keyingi qon ketishi, mikrotsitar anemiya) va homilaga xos (muddatidan oldin tug‘ilish, past tana vazn bilan tug‘ilish, tug‘ma nuqsonlar, o‘lik tug‘ilish, nerv-psixik rivojlanishning sustligi) asoratlarning yuqori uchrashini aniqlashga yo‘naltirilgan. “Hodisa-nazorat” (case-control) metodologiyasi asosida olib borilgan ushbu tadqiqot AIT tashxisiga ega homilador ayollar (n=30) va AITsiz nazorat guruhi (n=30) o‘rtasidagi klinik ko‘rsatkichlarni taqqoslaydi. Natijalar AIT bilan og‘rigan ayollarda homiladorlik davrida asoratlarning statistik jihatdan sezilarli darajada yuqori uchrashini ko‘rsatdi, xususan, preeklampsiya, muddatidan oldin tug‘ilish va past tana vazn bilan tug‘ilish kabi holatlar dominantlik qildi. Tadqiqot AITning homiladorlik kechishiga salbiy ta’sirini tasdiqlaydi va ushbu bemorlarni erta aniqlash, doimiy klinik monitoring va maqsadli terapevtik intervensiyalar zarurligini ta’kidlaydi. Ushbu natijalar perinatal tibbiyot va endokrinologiya sohasida profilaktik va klinik strategiyalarni optimallashtirish uchun muhim asos bo‘lib xizmat qiladi.