Ноалкогол жигар ёғли гепатозида нейродегенератив жараёнлар ривожланишининг хавф омиллари

Сурункали жигар касалликлари орасида ҳозирги кунда ноалкогол жигар ёғли гепатози (НАЖЁГ) энг кенг тарқалган касалликлардан ҳисобланади. НАЖЁГ касаллиги билан бутун дунё аҳолисининг тахминан 25% га яқини азият чекади, 2030 йилга бориб бу кўрсаткич 33,5% га ортиши тахмин қилинмоқда [1]. Жигар касалликлари орасида ёғли гепатознинг учраши 70% ни ташкил этади [2]. Жигар циррозига олиб келувчи касалликлар орасида ҳам ёғли гепатоз етакчи ўринни эгаллайди. НАЖЁГ тарқалишининг кескин ўсиши ҳозирги вақтда авж олиб бораётган семиришнинг кучайиши билан, касаллик патогенези метаболик синдром ва инсулинрезистентлик билан чамбарчас боғлиқ. Шуни таъкидлаш керакки, НАЖЁГ фақат жигар касаллиги деб ҳисобланмайди, чунки кўплаб аъзолар тизими жигар яллиғланиши патогенезида иштирок этади. Шу сабабдан, ёғли гепатоз келиб чиқишида бошқа аъзолар тизими муҳим рол ўйнайди ва улар ҳам ўз навбатида ёғли гепатоз таъсирига учрайди. .