Xalqaro turizm rivojlanishining ekologik muammolari

Zamonaviy turizmga bo'lgan e’tibor XX asrda boshlangan bo'lsada, uning rivojlanishi XXI asrga to'g'ri keldi. Bugungi kunda dunyoning 193 davlatidan 150 dan ortig'i turizm bilan shug'ullanadi. BMTning Turizm tashkiloti (UN Tourism) ma’lumotlariga ko'ra, 2023-yilda xalqaro turizmdan olingan daromadlar barqaror o'sib, 1,4 trln. AQSh dollariga yetdi [5]. Bu raqam turizmning global iqtisodiyotdagi ahamiyati ortib borayotganligi va bu tarmoqning aholi bandligini oshirish hamda millatlararo madaniy hamkorlikni rivojlantirishdagi ahamiyati beqiyos ekanligidan dalolat beradi. Shuni ta'kidlash kerakki, bunday o'sish global darajada yuz berayotgan jarayonlar natijasi bo'lgan noaniqlik sharoitida amalga oshmoqda, bu esa, o'z navbatida, turizmning faoliyat sifatida barqaror ekanligidan darak beradi.