To'plam O'zbekiston Respublikasi olimlari, mutaxassislari va xalqaro ekspertlarning raqamli texnologiyalar sohasidagi jinoyatlarga qarshi kurashish hamda axborot-xavfsizligini ta'minlash masalalariga bag'ishlangan ilmiy maqola va tezislaridan tashkil topgan. Jumladan, mualliflar tomonidan kiberjinoyatlarga qarshi kurashishning o'ziga xos jihatlari, axborot texnologiyalaridan foydalangan holda sodir etilayotgan jinoyatlarni tergov qilish va jinoyat ishlarini ko'rishda sud amaliyoti, axborot xavfsizligini ta'minlashda davlat organlarining ahamiyati, sun'iy intellekt texnologiyalarining roli va kibersug'urtalashning zaruriyligi, ijtimoiy tarmoqlarni huquqiy tartibga solishning masalalari o'rganib chiqiladi. To'plam raqamli texnologiyalar sohasidagi huquqbuzarliklarga qarshi kurashish bo'yicha izlanish olib borayotgan ilmiy xodimlar, o'qituvchi va professorlar, ilmiy izlanuvchilar, talabalar va ushbu mavzuga qiziquvchi boshqa shaxslar uchun mo'ljallangan.